Case No.SA 18417/2022 முதியோர் மற்றும் ஊனமுற்றவர்,விதவை பயனாளிகள் பெயர் பட்டியல், முழு விலாசம் உள்ளிட்ட தகவல்களைக் வழங்கக் கோரி மனு

முதல் மேல்முறையீட்டு அலுவலரிடமிருந்தும் தகவல் கிடைக்கப்பெறவில்லை என சட்டப்பிரிவு 19(3)-ன்கீழ் தனது இரண்டாவது மேல்முறையீட்டு மனுவினை மனுதாரர் இவ்வாணையத்தில் தாக்கல் செய்துள்ளார்.
இவ்வழக்கு குறித்த இன்றைய விசாரணையில், மனுதாரர், தான் கோரிய தகவல்களுக்கு உரிய தகவல்கள் தனக்கு நாளதுவரை வழங்கப்படவில்லை என எடுத்துரைத்தார். பொதுத் தகவல் அலுவலர், மனுதாரர் சட்டப்பிரிவு 6(1)-ன்கீழ் கோரிய தகவல்கள் பதிவஞ்சல் வாயிலாக அனுப்பப்பட்டு, மேற்படி தகவல் பெறப்படாமல் திருப்பிவிடப்பட்டதாக எடுத்துரைத்தார்.
மனுதாரர் மற்றும் பொதுத் தகவல் அலுவலர் வாதம் மற்றும் ஆவணங்களை ஆணையம் பரிசீலனைக்கு எடுத்துக்கொள்ளப்பட்டது. மனுதாரர் சட்டப்பிரிவு 6(1)-ன்கீழ் கோரியுள்ள, விக்கிரவாண்டி வட்டம், பனமலை கிராமத்தில் முதியோர் மற்றும் ஊனமுற்றவர், விதவை பயனாளிகள் பெயர் பட்டியல், முழு விலாசம் உள்ளிட்ட 5 இனங்களுக்கான தகவல்களை, பொதுத் தகவல் அலுவலர், இவ்வாணை கிடைக்கப்பெற்ற 30 தினங்களுக்குள், அலுவலக முத்திரையுடன் கூடிய சான்றொப்பமிட்டு, ஒப்புகை அட்டையுடன் கூடிய பதிவஞ்சலில் மனுதாரருக்கு வழங்கி, அதனை அவர் பெற்று ஏற்பளிப்பு செய்ததற்கான ஒப்புகை அட்டையின் நகலினை இவ்வாணையத்திற்கு அனுப்பிவைக்க பொதுத் தகவல் அலுவலருக்கு உத்தரவிடப்படுகிறது.
மேலும், மேற்படி ஆணைக்கிணங்க பொதுத் தகவல் அலுவலர் தகவல் வழங்க தவறும் பட்சத்தில் தகவல் பெறும் உரிமைச் சட்டம் 2005, பிரிவு 20(1) மற்றும் 19(8)(b)-ன்கீழ் நடவடிக்கை எடுக்க பரிந்துரைக்கப்படும் என அறிவுறுத்தப்படுகிறது.